قصيدة للشاعر عمرو حسني
طفله بتضحك فى بلكونة بيتها ف ميدان التحرير
وأسود قصر النيل مذهوله
قاعدين يحكوا ألف بطوله
قام بيها كل الجماهير
واحد منهم بص عليها ..
وقال لزميله سؤال بزئير :
حاجه غريبه بجد كتير
دى شقه طول عمرها مقفوله؟
من بعد تلاته وسبعين
دايماً نورها مطفى وضلمه
وعمرى ما شفت بنات حلوين
من شبابيكها علينا تطل
دلوقتى البلكونه بتلمع
والشيش مغسول زى الفل؟!
رد زميله بضحكه وشاور ..
لشباب فوق عواميد النور
شايلين العلم المسحور
قال : إفتح مخك وافهمنى
طول عمر البنت دى موجوده
بس انت اللى ماكنتش شايف
كنت مغمض عينك خايف
طول عمرك يا صاحبى مبلم
ومصدّر ضهرك للنيل
دلوقتى بقينا بنتكلم
من بعد ما كنا تماثيل
علشان الروح دبت فينا
وبقينا قطاقيط قطقوطه
وعيوننا بتلمع مبسوطه
وشنباتنا لها شكل جميل
وبتمسح على وشنا فوطه
مبلوله بعطر الجماهير
ف إيدين بنوته كتكوته
كانت واقفه فى بلكونة بيتها ف ميدان التحرير
· رئيس تحرير مجلة قطر الندى
ليست هناك تعليقات:
إرسال تعليق